WAZIRI WA AFYA ATOA MASAMAHA KWA WATOTO WALIOBAKWA NA ULAWITI

Waziri wa Afya Ummy Mwalimu atoa msamaha wa matibabu na vipimo kwa watoto ambao wamefanyiwa vitendo vya ulawiti na kubakwa. Pia amezitaka hospitali za serikali pindi watoto hao wapelekwapo hospitali wapewe kipaumbele kwenye kupata vipimo na tiba.

Msamaha huo umekuja baada ya vitendo vya ulawiti na ubakaji kushamiri kwa kasi ambapo imeripotiwa kuwa matukio ya ubakaji na ulawiti yanayoripotiwa vituo vya polisi yamefikia 15 kwa siku.

Wazazi wengine wamekuwa wakikosa matibabu ya watoto wao kutokana na gharama kubwa za vipimo na dawa ambavyo vimekuwa vikifikia na kuzidi 250,000 kwa baadhi ya hospitali hivyo wazazi wa kawaida kushindwa kumudu na kuacha liende tu.

Pia waziri wa afya amesema kuwa atakutana na waziri wa sheria na katiba na mwanasheria mkuu ili waone namna ambavyo wanaweza kufanya mchakato wa kuweka makosa ya ubakaji na ulawiti wa watoto kuwa kwenye makosa yasiyo na dhamana.

Waziri Ummy Mwalimu amesema atawaandikia barua waganga wakuu wa mikoa na wilaya kuhusu matibabu hayo. Pia ameahidi kutoa namba maalum ambayo watu watakuwa wanaripoti endapo watakuwa wametozwa gharama yoyote.

Waziri pia amepiga mkwara kwa wazazi wanaomaliza kesi hizi nje ya mahakama kwa kupewa hela yoyote, amesisitiza kuwa hela haiwezi kuwa na thamani kuliko utu wa watoto wetu.

Maoni yangu:
Ni hatua nzuri sana hasa ukizingatia kuwa vitendo hivi vimeshamiri na wazazi wengi wamekuwa wakiogopa kuwapeleka watoto hospitali kutokana na mlolongo kuanzia polisi na mpaka hospitali.Hatua hii itapelekea vitendo hivi kuripotiwa kuliko awali.

Kuhusu makosa ya ulawiti na ubakaji kuwa kwenye makosa yasiyo na dhamana nayo ni habari njema maana tumeshuhudia jinsi wabakaji hao wajitapavyo pindi wapatapo dhamana, juzi juzi kuna mbakaji kapata dhamana na kuamua kushona suti sare na mkewe na kusherekea.