ZITTO KABWE ASHANGAZWA KUFUKUZWA KUHUSISHWA NA LIPUMBA NA KUHUSISHWA KWA ACT

Tungeshangaa sana kama swali hili (kuhusu Prof. Lipumba kuhamia ACT) lisingetokea kwa sababu na sisi kutwa nzima ya jana tumesikia hizo fununu. Lakini naamini baada ya mkutano wetu huu na waandishi wa habari, nyie waandishi mmethibitisha kuwa fununu hizo si za kweli. Chama chetu sisi kipo wazi. Mtu yeyote ana haki ya kujiunga iwapo anakubaliana na misingi, katiba na itikadi ya chama. Kwa hiyo mtu yeyote yule raia wa Tanzania ambaye anajiona ni mzalendo ana uhuru wa kujiunga na chama chetu. Pale ambapo jambo hilo litatokea tutawajulisha. Chama chetu sisi ni cha uwazi. Kwa hiyo, tusingependa watu ambao wanatuwekea maneno. Watu ambao wanatabiri vitu ambavyo kimsingi havipo kwa malengo yao. Kwa mfano hizo fununu ambazo zilisambazwa jana zilikuwa fununu zenye malengo hasi. Kwa sababu tunafahamu, wenzetu wa Chama cha Wanachi CUF wana masuala yao yanayoendelea. Ni demokrasia ya ndani ya chama chao ambayo sisi tusingependa kuiingilia. Sisi tungependa kuona wanamaliza tofauti zao kwa amani ili kuimarisha mfumo wa vyama vingi katika nchi yetu…Sisi tulikuwa na kikao cha kawaida kabisa cha chama (Kamati Kuu) na tumejadili ajenda ambazo nimewaeleza (Hali ya nchi na masuala mengine ya chama) na taarifa yetu tumeitoa na mmeiona. (Kwa hiyo) kama nilivyoeleza hapo awali, mtu yoyote anayedhani kuwa anaweza kuendesha siasa ndani ya Chama chetu, tunamkaribisha kwa mikono miwili na tutaweza kufanya kazi kwa pamoja. Lengo letu sisi ni kuhakikisha mfumo wa vyama vingi katika nchi yetu unaimarika. Lengo letu sisi ni kuifanya nchi yetu iwe ya kidemokrasia na kuiondoa katika hali inayoendelea hivi sasa ya kuwa kwenye utawala wa imla wa mtu mmoja ambaye yeye ndiye anayeamua ‘Kun faya kun’ linakuwa”
Zitto Kabwe, Kiongozi wa Chama, ACT Wazalendo.
Mkutano na waandishi wa habari, Tarehe 06 Septemba 2016