KAMATI KUU ACT WAZALENDO YATOA YA MOYONI KUHUSU HATIMA YA SIASA NA UCHUMI NCHINI

Chama cha ACT-Wazalendo kimetoa taarifa yake kuhusu mwenendo wa serikali ya awamu ya tano mara baada ya kumalizika kwa kikao cha kamati kuu kilichoketi Jumatatu ya Septemba, 5, ambapo kimezungumzia hali ya kisiasa, hali ya kiuchumi na kuzungumzia umoja wa kitaifa.

Akielezea kuhusu hali ya kiuchumi Kiongozi Mkuu wa ACT, Zitto Kabwe amesema kwa kipindi ambacho Rais Magufuli amekuwa madarakani kasi ya ukuaji wa uchumi ambayo ilikuwepo awali imepungua kwa asilimia nne kutoka asilimia tisa hadi asilimia tano jambo ambalo halijawahi kutokea kwa kipindi kirefu katika historia ya Tanzania.

“Kamati Kuu imeshtushwa na hali ya kuanza kudorora kwa shughuli za uchumi katika kipindi cha miezi 10 ya utawala wa awamu ya tano, kwa mfano; kwa robo ya mwaka 2015 yaani Oktoba hadi Disemba taarifa zilizopo katika tovuti ya Benki Kuu ya Tanzania zinaonyesha pato la taifa lilikuwa likipanda kwa asilimia tisa,

“Katika robo ya kwanza ya mwaka 2016 yaani Januari hadi Machi kasi ya ukuaji wa pato la taifa ilishuka hadi asilimia 5.5, hii inamaanisha kuwa ukuaji wa shughuli za kiuchumi katika kipindi cha miezi 6 ya mwanzo ya utawala wa awamu ya tano chini ya Rais Magufuli imepungua kwa asilimia 4,” alisema Zitto.

Zitto alisema kuwa kutokana na kupungua kasi ya ukuaji wa uchumi Kamati Kuu ya ACT imetoa mapendekezo kwa serikali ambayo inaamini kama yakifanyiwa kazi basi itaweza kuimarisha hali ya uchumi na kuwa na kasi kama ilivyokuwa awali.

“Tunaitaka serikali izingatie sayansi ya uchumi katika kuendesha uchumi wa nchi. Uamuzi wa CCM wa kuitelekeza serikali yake kwa mwanasiasa mmoja anayedhani ndiye anayejua kila kitu na yeye kugeuka kuwa mshauri wa washauri wa uchumi itasambaratisha uwekezaji nchini na kuua kabisa juhudi za miaka 20 ya kuvutia wawekezaji na kujenga uchumi,” alisema Zitto.